Tanzanian Association Oslo

Mada ya wiki hapa Norway:

Ruzuku kwa vyama vya wageni

Aftenposten, 23.02.2010

Kuanzia Jumanne wiki hii hapa Norway kumekuwa na gumzo kwenye magazeti, haswa gazeti kubwa la kila siku la Aftenposten kuhusu ya ruzuku na hela zinazotolewa na Manispaa na  serikali kuu kwenye vyama vya kijamii vya watu wenye asili ya nje ya Norway. 

Aftenposten, 23.02.2010

Wadau wanaopinga kutolewa kwa ruzuku  kwa hivi vyama, wanadai kuwa lengo hasa la utoaji wa hizo hela limepotea kwani hela wanazopewa vyama vya wageni na shughuli zao wanazofanya, haziendani kabisa na lengo asili la ruzuku hizi. Badala ya kuwajumuisha wageni na wazawa kwa pamoja, matokeo yake ni kuwa wageni wengi wamekuwa wakijitenga kwa kutumia miamvuli ya vyama vyao na shughuli zao, ambazo nyingi ya hizi shughuli haziwajumuishi wazawa hata kidogo. Badala yake, wageni hujitenga badala ya kujijumuisha kwa pamoja na wazawa.

Aftenposten, 23.02.2010

Aftenposten limegundua kuwa vingi ya hivi vyama vinaendeshwa kwa kujuana, kindugu, kikabila, kitabaka na kadhalika. 

Mfano uliotolewa iweje kuwe na zaidi ya vyama 54 vya watu wenye asili ya Somalia, kwanini pasiwe na chama kimoja kikuu chenye lengo la kuwaunganisha Wasomali wote, badala yake kuwe na vyama vingi vyenye lengo la kuzidi kuwatenganisha Wasomali na bado Manispaa na serikali inatoa hela kwa hivi  vyama bila ya kufuatilia na kujua lengo haswa la hivi vyama na jinsi hela zinavyotumika.

* Wasomali wana vyama 54

* Wapakistani wana vyama 46

* Waturuki wana vyama 14

* Watamili wana vyama 13

Aftenposten, 24.02.2010

Au mfano mwingine, iweje kuwe na chama cha maskauti wa Kiislamu na bado kipewe ruzuku badala ya kuwa na chama cha maskauti kinachowajumuisha vijana wote, wakiwepo wa jinsia tofauti, dini tofauti na asili tofauti.

Aftenposten, 25.02.2010

Mfano mwingine ni baadhi ya hivi vyama kuandikishwa kwa jina la mtu mmoja, lakini bado huyo mtu ana wanachama wanaolipa ada za mwaka na huyu mtu anaweza kuomba pesa na bado akapewa, bila ya kufuatiliwa kwa undani zaidi ni nini hasa lengo la shughuli zake. Wengi wenye vyama vya namna hii ni watu wenye asili ya Pakistan. Si muda mrefu uliopita, iligundulika kuwa baadhi ya hawa hawa watu wamechukua mamilioni ya hizi ruzuku na kujijengea mahekalu huko Pakistan.

Vyama hivi, huandika miradi kama inavyotakiwa kwenye masharti ya maombi, lakini vikishapata hela, zinavyotumika hizo hela haijulikani.

Wadau wanaopinga ruzuku za namna hizi, wanaomba serikali za mitaa na serikali kuu zisitishe kwa muda utoaji wa ruzuku kwa vyama vyote vya kigeni, pafanyike utafiti wa kina juu ya hizi ruzuku kabla ya kuondelea kutolewa. Wadau hawa wanadai kuwa kuna vyama vingi tu vinavyojiendesha bila kutegemea hizi ruzuku. Kama hivi vyama vinaweza kujiendesha bila ruzuku kwa nini nini hivyo vingine zisiweza kujiendesha bila kupewa ruzuku.

Tunasubiri usemi kutoka kwenye serikali za mitaa na serikali kuu juu ya hizi ruzuku. Huenda labda vyama vya upinzani vikajipatia pointi kwenye hili suala.

Yetu macho na masikio!

na mhariri wa blogu.


Tanbihi: Chama Cha Watanzania Oslo (CCW Oslo), kimekuwa kikijiendesha bila ruzuku toka kwenye Manispaa ya Oslo au serikali kuu kwa muda mrefu. Shughuli nyingi za CCW Oslo zimekuwa za kujitolea toka kwa baadhi ya Watanzania na jamaa zao waishio Oslo, Akershus na Norway kote.