Lowassa aelekea Vienna

Edward Lowassa

WAZIRI Mkuu Edward Lowassa anaondoka Dar es Salaam leo (Jumamosi Des. 1, 2007) alasiri kwenda Vienna mji mkuu wa Austria kuhudhuria mkutano mkuu wa Shirika la Umoja wa Mataifa la Maendeleo ya Viwanda (UNIDO).

Lowassa ambaye ataongoza ujumbe wa Tanzania kwenye mkutano huo wa Desemba 3 hadi 7, 2007, atakuwa mmoja wa wazungumzaji wakuu katika mkutano huo wa 12 wa UNIDO.

Wazungumzaji wengine ni Rais Ernst Koroma wa Sierra Leone; Waziri Mkuu Tertius Zongo wa Burkina Faso; Waziri Mkuu Zeljko Sruranovic wa Montenegro na Waziri Mkuu Lansana Kouyate wa Guinea.

Wengine katika ujumbe wa Waziri Mkuu Lowassa ni Naibu Waziri wa Viwanda, Biashara na Masoko, Hezekia Chibulunje na Balozi wa Tanzania kwenye Mashirika ya Umoja wa Mataifa, Geneva, Uswisi, Marten Lumbanga.

Waziri Mkuu Lowassa anatarajiwa kurejea Dar es Salaam Desemba 6, 2007.(mwisho)

Imetolewa na:Ofisi ya Waziri Mkuu,S.L.P. 3021,DAR ES SALAAMJumamosi Des. 1, 2007