Tanzanian Association Oslo

Rais Kikwete

si nchi....

Rais Jakaya Kikwete alipolihutubia Bunge jana mjini Dodoma

Rais Jakaya Kikwete amepigilia msumari wa mwisho kwenye mjadala uliochukua wiki kadhaa sasa wa kama Zanzibar ina hadhi ya nchi kwa kusema kuwa kwa masuala ya ndani Zanzibar ni nchi, lakini kwa masuala ya nje, nchi ni Tanzania. Alitoa msimamo huo mjini hapa jana wakati akilihutubia Bunge na Taifa.

Alisema; “Nchi yetu ni moja, watu wake wamoja na Muungano uko imara, haya yaliyozuka ya Zanzibar ni nchi au si nchi tutayamaliza kwa kufuata utaratibu.” Hata hivyo, aliwatahadharisha wanasiasa na hasa viongozi, kuacha kutoa matamshi juu ya suala hilo ambayo yanaweza kugonganisha vichwa vya wananchi. “Kama zipo ajenda nyingine tuziseme, si hili,” alisema Kikwete.

Huku akionyesha kukerwa, Rais Kikwete aliwakemea baadhi ya viongozi wa serikali (hakuwataja) walioko katika Kamati ya pamoja inayoshughulikia namna ya kuondoa kero za Muungano, ambao wako mstari wa mbele katika kuchochea malumbano hayo. Ingawa hakuwataja, baadhi ya viongozi wa Zanzibar waliolishupalia suala hilo la Zanzibar ni Naibu Waziri Kiongozi Ali Juma Shamuhuna na Waziri wa Nchi katika Ofisi yake, Hamza Hassan Juma.

“Hii si sawa, tunaigawa nchi,” alisema Rais Kikwete huku akipiga marufuku malumbano ya hadharani baina ya viongozi wa pande zote za Muungano juu ya suala la Zanzibar. Alisema inasikitisha kwamba leo hii miaka 44 tangu kufanyika kwa Muungano wa Zanzibar na Tanganyika baadhi ya viongozi wanashindwa kuelewa kilichokubaliwa baina ya waasisi wake, Mwalimu Nyerere na Abeid Amani Karume.

“Waliunda mamlaka (sovereignty) mpya inayofahamika kama Tanzania. Kwa mambo ya ndani kuna mambo ya nchi ya Zanzibar na sheria, kwa mambo ya nje kuna Tanzania. Tatizo ni nini?” alihoji Rais. Mjadala aliokuwa akiuzungumzia Rais uliibuka baada ya Waziri Mkuu Mizengo Pinda kujibu swali katika mkutano wa sasa wa 12 wa Bunge unaoendelea hapa Dodoma kwamba Zanzibar si nchi.

Kauli yake hiyo ilisababisha mwangwi wenye mtikisiko wa siasa, hasa kutoka kwa baadhi ya mawaziri na wajumbe wa pande zote wa Baraza la Wawakilishi Zanzibar. Akirejea mazungumzo ya Mwafaka wa siasa kati ya CCM na CUF ambayo sasa yamekwama, Rais Kikwete alisema jitihada zinazofanywa ni kuyanasua mazungumzo hayo yalipokwama, ingawa alikiri kuna uzito hasa kutokana na pande zote kuwa na kiwango kikubwa cha kutoaminiana. Alisema yeye na serikali yake hawajakata tamaa na matarajio ni kuhakikisha ifikapo mwakani mazungumzo hayo yawe yamekamilika.


Kutoka: HabariLEO Ijumaa 22.08.2008