Tanzanian Association Oslo

Mtoto abakwa, maiti yatupwa kisimani

Imeandikwa na Lucas Raphael,Tabora; Tarehe: 21st October 2009

WATU wasiofahamika, wamembaka mwanafunzi wa darasa la tano na kutupa maiti yake katika kisima chama maji.

Kaimu Kamanda wa Polisi, mkoa wa Tabora, Anthony Ruta, amewaeleza waandishi wa habari kwamba mtoto huyo alikuwa amekwenda kuchota maji katika kisima hicho.

Kwa mujibu Kamanda Ruta,mwanafunzi huyo alibakwa na kuaga dunia Jumatatu saa 12 jioni katika kijiji cha Utakuja, Kata ya Itetemya katika Manispaa ya Tabora.

Ruta amesema, mwili wa mtoto huyo aliyekuwa na umri wa miaka 17, ulikutwa na majeraha sehemu kadhaa. Amesema, hakuna mtu aliyekamatwa kuhusiana na tukio hilo la mauaji.

Katika tukio lingine, mwanamke, mkazi wa Mangungu, wilayani Igunga, Lembe Lujiga ameuawa akiwa nyumbani kwake kwa madai ya imani za kishirikina.

Ruta amesema,watu wasiojulikana walimuua mwanamke huyo kwa kumchoma na kitu chenye ncha kali, lakini kuna madai kuwa, chanzo cha mauaji hayo ni imani za kishirikina.

Ametoa mwito kwa wananchi watoe taarifa kuhusu mtu yeyote watakayemhisi kuhusika na mauaji hayo.