Duh!

Binti wa Kiislamu na ulimbwende

Hamida Hassan na Imelda Mtema

Baraza Kuu la Waislamu nchini, BAKWATA limesema si haki wala halali kwa mabinti wa kiislamu kushiriki mashindano ya urembo kwa vile yanadhalilisha wanawake kwa kuwaweka nusu nguo, nusu utupu, Ijumaa linashuka sanjari na mtoa tamko hilo

Akilipa elimu gazeti hili, Naibu Katibu Mkuu (Dini) wa BAKWATA, Mohammed Hamis Said alisema kuwa, hii ni mara ya pili kwa chombo hicho cha juu cha mshikamano wa kiislamu nchini kutoa tamko kuhusu mashindano hayo.

“Suala hili tulishaliongelea sana na kutoa tamko kuwa, ni haramu kwa mwanamke wa kiislamu kushiriki mashindano hayo lakini kwa sababu nchi inaenda na utandawazi na maendeleo hakukuwa na jinsi,” alisema Said.

Aidha, Naibu huyo alisema kuwa, uozo uliopo sasa nchini ni kitendo cha baadhi ya watu kufuata tamaduni za nje (Magharibi) na iwapo wao (BAKWATA) wataingilia swala hilo kwa undani zaidi watakutana na sheria inayowabana kutoka kwa jamaa wa haki za binadamu, “hivyo swala hili linabaki kwa mtu mwenye jina la kiislamu na si mwislamu,” alisema.

Alifafanua zaidi kwamba, anavyojua yeye, mabinti waislam wanaoshiriki mashindano ya u-Miss wana majina ya kiislamu lakini si waislamu kwani mtu anayefuata maadili ya kiislamu kamwe hawezi kushiriki mashindano hayo.

Nao baadhi ya waumini wa imani hiyo, walisema kuwa, wamechoshwa na mashindano hayo na kuwalaani wazazi wanaowaruhusu binti zao kwenda kushiriki mashindano hayo kuwa, hawajui wanachokifanya kwani wanamruhusu mtoto kukulia katika maadili ya kishetani.

“Unajua kumwacha mtoto wako akaingia katika mashindano ya urembo ni kumdhalilisha yeye na wewe mzazi, kwanza kwa itafika mahali binti wa Kiislamu akishiriki tunamchapa bakora hadharani,” alisema mama Husna akisema yeye ni mkazi wa mtaa wa Songea, Ilala jijini Dar es Salaam.

Toka Global Publishers