Tanzanian Association Oslo

Mtanzania atinga fainali ya Big Brother Africa.

HabariLeo; Wednesday,October 24, 2007 @00:06.

HATIMAYE mshiriki wa shindano la Big Brother Africa 2 kutoka Tanzania Richard Bezuidenhout. Ametinga fainali za shindano hilo baada ya kutokuwapo katika orodha ya washiriki wanaopigiwa kura za kutoka wiki hii.

Kwa wiki hii washiriki watatu wa kike waliosalia katika jumba hilo, Tatiana wa Angola, Maureen wa Uganda na Ofunneka wa Nigeria wamependekezwa kupigiwa kura na watazamaji.

Mtanzania huyo ametinga fainali kutokana na hatua ya mshiriki Tatiana ambaye amepata bahati ya kuwa mkuu wa nyumba kukataa kuondoa jina lake na kuliweka la Richard kwa madai kuwa kijana huyo amependekezwa mara nyingi.

Richard, anakuwa mshiriki wa pili wa Tanzania kuingia fainali za mashindano hayo. Mwingine alikuwa Mwisho Mwampamba aliyefika fainali za takriban miaka mitatu iliyopita lakini alishindwa na Cherise Makubale wa Zambia.

Richard alimpendekeza Maureen na Ofunneka kwa madai kuwa Maureen amekuwa na matatizo na washiriki wenzake huku Ofunneka amempendekeza kwa madai kuwa hawezi kumpendekeza Tatiana.

Ofunneka aliwapendekeza Richard na Tatiana kutokana na kuwapo washiriki wachache huku akiamini kuwa Tatiana ambaye ameteuliwa kuwa mkuu wa nyumba ataweza kujiokoa mwenyewe.

Kwa upande wa Maureen yeye aliwapendekeza Ofunneka na Tatiana, kwa madai kuwa Ofunneka amebadili tabia dhidi yake na kuwa Tatiana ataweza kujiokoa mwenyewe.

Tatiana alimpendekeza Ofunneka na Maureen kwa kigezo kuwa asingeweza kumpendekeza Richard.

Mshiriki atakayeondolewa wiki hii atafanya kufikiwa idadi ya washiriki tisa walioondolewa katika shindano hilo na kuwafanya wasalie washiriki watatu ambao wataingia katika kinyang’anyiro cha kuwania dola za Marekani 100,000, (sawa na Sh milioni 100 za Tanzania) .

Washiriki ambao wamekwisha aga mashindano hayo ni Code, Maxwell, Lerato, Kwaku, Mery , Bertha, Justice na Jeff.

Hata hivyo, Big Brother ametangaza hatua ya kuongeza washiriki wawili ambao watakaa kwenye jumba hilo mpaka mwisho wa mchezo, lakini hawatakuwa na nafasi ya kushinda zawadi.

Katika hatua nyingine, Ofunneka na Richard wameshinda zawadi za simu aina ya Motorolla kwa kufanya kazi nzuri waliyopewa ya kuandaa tangazo la MTN.